ҒАЛАМДЫҚ НАРЫҚТАР
Ірі технологиялық компаниялар акцияларының өсуі қор нарығында өсімге себеп болды, ал Nvidia Corp. компаниясының нарықтық құны қысқа уақыт ішінде 4 трлн АҚШ долларына жетті. АҚШ-тың қазынашылық облигациялары 39 миллиард долларлық сәтті орналастырудан кейін қымбаттады. Бразилия реалы АҚШ президенті Дональд Трамптың 50 пайыздық импорттық тариф енгізетіні туралы мәлімдемесінен кейін күрт әлсіреді.
CNN Fear & Greed Index көрсеткіші қазір «шектен тыс ашкөздік» деңгейінде тұр — бұл нарықтағы айқын «бұқа» көңіл-күйінің белгісі. Ірі компаниялар индексі 1,1 пайызға өсті, ал Nvidia акцияларының өсімі жыл басынан бері 20 пайыздан асты. Инвесторлардың тәуекелге бейімділігінің тағы бір белгісі — биткойн бағасының алғаш рет 112 000 АҚШ долларынан асуы болды.
Сәрсенбі күні Трамп Алжир, Ливия, Ирак және Шри-Ланкадан келетін өнімдерге 30 пайыздық, Бруней мен Молдоваға — 25 пайыздық, ал Филиппинге — 20 пайыздық тариф енгізетінін мәлімдеді. Бразилия үшін 50 пайыздық тариф қазіргі уақытта жарияланған ең жоғары мөлшерлердің бірі болып отыр және ол тамыз айында күшіне енуі тиіс. Трамп өз үндеуінде бұрынғы президент Жаир Болсонаруға қатысты қозғалған іс жөнінде сөз қозғап, Бразилия билігін оны төңкеріс жасауға тырысты деген айыптан босатуға шақырды. Бразилия президенті Луис Инасиу Лула да Силва АҚШ-қа елдің өзара жауап беру туралы заңына сәйкес жауап беретінін айтты.
АҚШ қазынашылық облигациялар нарығы қатарынан бес күнге созылған сатылымнан кейін өсіммен жабылды — 10 жылдық облигациялардың кірістілігі 6 базистік пунктке төмендеп, 4,34 пайызды құрады. Қаржы министрлігі бұл облигацияларды 4,362 пайыздық кірістілікпен орналастырды. Бейсенбі күні 30 жылдық облигацияларды 22 миллиард долларға орналастыру жоспарланған.
BNP Paribas деректеріне сәйкес, хедж-қорлар мен волатильділікке бағытталған қорлар секілді түрлі инвесторлардың портфеліндегі акциялардың үлесі біртіндеп өсіп, қазір бейтарап деңгейден сәл жоғары деңгейде орналасқан.
Тарифтерге қатысты алаңдаушылықтың артуына қарамастан, қор нарықтары өсуді жалғастыруда. MSCI All Country World Index жаһандық индексі өткен аптада тарихи максимумға жетті, ал S&P 500 индексі сәрсенбі күнгі сауданы өткен аптадағы рекордқа жақын деңгейде аяқтады.
Жапонияда мемлекеттік облигациялар аукционына деген сұраныс төмен болды, себебі алдағы парламенттік сайлау елдің мемлекеттік қарызының одан әрі өсу ықтималдығын арттырып отыр. Елдің Қаржы министрлігі ұзақ мерзімді облигациялар көлемін қысқарту арқылы ұсыныс құрылымын қайта қарап, нарықтағы құбылмалылықты біршама бәсеңдетті. Жоғарғы палатаға сайлау осы айда өтеді.
Мыс бағасы өсіп келеді, себебі Трамп 1 тамыздан бастап АҚШ-тың мыс импортына 50 пайыздық тариф енгізетінін растады — бұл өнеркәсіптік шикізатқа тәуелді өндірушілерге соққы болмақ. Лондон металл биржасындағы (LME) мыс фьючерстері 0,4 пайызға қымбаттап, бір тоннасы 9 664,50 АҚШ долларын құрады. Comex биржасындағы келісімшарттар шамамен 3 пайызға өсті. Жаһандық өндірушілер АҚШ-тың бұл әрекетіне дайындалып, соңғы күндері мыс жеткізілімін жеделдету үшін оларды Гавайи мен Пуэрто-Рикоға бағыттауда.
КОРПОРАТИВТІК ЖАҢАЛЫҚТАР
- Microsoft Corp. компаниясының рейтингі Oppenheimer тарапынан көтерілді.
- Apple Inc. өзін «тариф енгізуге тым ірі компания» деп санайды, деп мәлімдеді Ақ үйдің сауда кеңесшісі Питер Наварро.
- Meta Platforms Inc. өзінің «суперинтеллект» жобасына жаңа қызметкерлер тарту үшін жоғары өтемақы ұсынды.
- Meta Platforms Inc. көзілдірік шығаратын әлемдегі ең ірі өндіруші EssilorLuxottica SA компаниясынан миноритарлық үлес сатып алды.
- Францияның монополияға қарсы реттеушісі Meta Platforms Inc. компаниясын онлайн-жарнама саласындағы бәсекелестік ережелерін бұзуы мүмкін деп ескертті.
- Merck & Co. шамамен 10 миллиард АҚШ долларына респираторлық препараттар шығаратын Verona Pharma Plc фармацевтикалық компаниясын сатып алуға келісім берді.
- Autodesk Inc. бәсекелес инжинирингтік бағдарламалық жасақтама әзірлеушісі PTC Inc. компаниясын сатып алуды қарастыруда. Осы жаңалықтардан кейін PTC акциялары 19 пайызға қымбаттады.
- UnitedHealth Group Inc. Medicaid сақтандыру бағытына жаңа басшы тағайындады.
- AES Corp., Microsoft сияқты IT-гиганттарға жаңартылатын энергия жеткізетін компания, сату мүмкіндігін қоса алғанда, түрлі нұсқаларды қарастыруда.
- Samsung Electronics Co. Apple компаниясы 2026 жылы өз моделін ұсынардан бұрын, үш жаңа бүктелетін смартфон үлгісін таныстырды.
- NTT Inc. 17,7 миллиард АҚШ долларына долларлық және еурооблигациялар шығарды — бұл Азиядағы компаниялар арасындағы ең ірі орналастыру.
- Жапон автокөлік өндірушілері АҚШ-қа экспортталатын өнімдердің бағасын рекордтық жылдамдықпен төмендетті.
ҚАЗАҚСТАН НАРЫҒЫ
Сәрсенбі күні KASE индексі 0,56 пайызға өсіп, 6 160,74 пунктке жетті. Өкілдік тізімдегі акциялар арасында ең көп мәміле АО "Қазақстан Халық Банкі" акцияларымен жасалды — 4 523 келісім. Сауда көлемі бойынша да осы акциялар көш бастады — 224,1 млн теңге.
Алты компанияның акциялары қымбаттады:
- АО "Ұлттық компания "ҚазМұнайГаз" (+1,70%),
- АО "Кселл" (+1,52%),
- АО "Банк ЦентрКредит" (+1,21%),
- АО "KEGOC" (+0,29%),
- АО "ҚазТрансОйл" (+0,24%),
- АО "Қазақстан Халық Банкі" (+0,02%).
Мемлекеттік бағалы қағаздармен (TONIA) бір күндік репо операцияларының кірістілігі 2 базистік тармаққа өсіп, жылдық 15,53 пайызды құрады. АҚШ долларымен қамтылған теңге свопының бір күндік мөлшерлемесі (SWAP-1D (USD)) 20 базистік тармаққа көтеріліп, 10,07 пайызды көрсетті. Ақша нарығындағы бір күндік құралдармен сауда көлемі 457,871 млрд теңгені құрады.
Сәрсенбі күнгі сауда қорытындысы бойынша, АҚШ долларының "ертеңгі" есеп айырысуымен орташа өлшенген бағамы 518,90 теңге болды, бұл теңгенің 0,68 теңгеге нығайғанын көрсетеді. Сауда көлемі 185,997 млн АҚШ долларын құрады, 567 мәміле жасалды.
- Минималды баға — 518,41 теңге,
- Максималды баға — 519,70 теңге,
- Соңғы мәміле бағасы — 518,75 теңге.
Корпоративтік жаңалықтар:
- Condor Energies сұйытылған газ бен метанол өндіретін зауыттар салуды жоспарлап отыр.
- Маңғыстау облысында қуаты 160 МВт болатын бу-газ қондырғысы салынады.
- Atasu Group Астана маңында көлік-логистика орталығын салмақ.
- Маңғыстау облысында «Кендірлі» тұщыту зауыты іске қосылды.
- ҚТЖ мен Қытай темір жолдары стратегиялық әріптестік туралы жаңа келісімге қол қойды.
- ҚТЖ директорлар кеңесі 1 000 қарапайым акция орналастыру туралы шешім қабылдады.
- ҚТЖ директорлар кеңесінің құрамы өзгертілді.
